Tānga, Whakaputanga

Products and Publications

Katoa, katoa ā mātou rauemi e whakaū ana i ngā mātāpono o ngā marautanga e whāia ana e ngā kura, arareo Māori mai, arareo Pākehā mai. Ko Te Aho Matua tērā, ko Te Marautanga o Aotearoa tērā, ko te New Zealand Curriculum anō hoki tērā. Ahakoa tōna momo tānga, arā, he rauemi ā-tā, ā-matihiko, ā-ipurangi rānei, ka tāraitia hei taunaki i ngā kaiako me ngā ākonga kia ekea te puhitaioreore, kia angitu.

arrow_downward

Ā mātou mahi, ā mātou tānga, whakaputanga:

  • Te hanga rauemi
  • He rauemi mā te kaiako, te ākonga me te akomanga
  • He rauemi mā ngā kaiwhakahaere

Te hanga rauemi

E wātea ana a CORE ki te matapaki, ki te hanga, ki te tā, ki te whakatairanga rauemi e hāngai ana ki ō hiahia. Rauemi ako mai, rauemi whakahaere atu, kei a mātou ngā pūkenga me ngā mōhiotanga e tika ana ki te hāpai i a koe e whakaaro tārai rauemi ana.

He rauemi mā te kaiako, te ākonga me te akomanga

Kua whakaputaina e CORE ētahi rauemi hāngai ana ki ngā marautanga me ngā taumata maha. Kua tuhia te nuinga ki te reo Māori anake, ā, he reo rua hoki ētahi. He pukapuka tā ētahi, he e-pukapuka hoki ētahi; he rauemi matihiko ētahi, he pūmanawa hoki ētahi. Tirohia ēnei kua puta kē i a mātou e rārangi mai nei.

Ringa Auaha
Koinei tētahi rauemi hei hāpai i ngā mahi whakamahere i te ako. E rua ngā rauemi i tēnei kohinga. Ko He Anga Ako mā te Pouako tērā atu o te kohinga. Kei te pae tukutuku Te Kete Ipurangi tēnei kohinga. Pāwhiritia te honongaitua nei He Anga Ako mā te Pouako. (I puta i te tau 2015)

Wetiweti, Weriweri me te Winiwini, Wiriwiri
He kohinga rotarota hei hāpai i ngā mahi ako mā roto mai i tētahi huarahi ako ngahau. 24 katoa ngā rotarota, 12 ki ia kohinga, ā, ko ngā aronga o ia rotarota he aronga tamariki. (I puta i ngā tau 2013 me te 2015)

He Kupu i Kore
E rua ngā momo o tēnei kēmu: he kēmu poari tākaro; he kēmu taupānga hoki. Kotahi tonu te ingoa, ‘He Kupu i Kore!’ Nā reira ka whai pānga mai te ao mariko ki te ao kikokiko, te ao kikokiko ki te ao mariko anō hoki. (I puta i te tau 2015)

Te Mahana Haere o Te Moana-nui-a-Kiwa
Ko te Huringa Āhuarangi tērā e pā ana ki ngā whenua katoa o te ao. E tūhura ana i tēnei rauemi te pānga o tēnei tūāhuatanga ki Te Moana-nui-a-Kiwa. (I puta i te tau 2015)

Tiketike Ngahuru, Hakahaka Raumati
Ka tūhura tēnei rauemi i tētahi tirohanga o tā te Māori whai i te wā, nā tā rātou mōhio ki te taiao me te marama, ki ngā pānga, ki ngā mahinga kai o uta, o tai. (I puta i te tau 2015)

Takatū Ake!
Kua waihangahia he moheni hou ā-tā, ā-ipurangi hoki mā ngā tamariki kei ngā reanga Tau 4-7. Ko te kaitiakitanga tōna tāhuhu, ko ngā mahi manaaki i te taiao puta i ngā kura, i ngā hapori, i Aotearoa, i te ao whānui anō hoki ōna peka. E rua ōna tānga ka kitea i konei:

(I puta i te tau 2016)

Te Takanga o te Wā 1–8
He pae tukutuku e whakaatu ana i ētahi rauemi ā-tā, rauemi ataata hoki e pā ana ki te hītori Māori i Aotearoa me ngā huarahi whakaako. Tēnā pāwhiritia te honongaitua nei Māori History. (I puta i te tau 2015)

Rūaumoko – Te Reo Haruru
Ko Rūaumoko e ngunguru nei! Ko Te Reo Haruru e ngunguru nei! He e-Pukapuka i tāraia e CORE rātou ko Kiwa Digital, ko Te Tāhuhu o te Mātauranga. E whā ngā reo e kawea ana i tēnei e-Pukapuka: te reo Māori, te reo Pākehā, Te Reo Rotarota Pākehā, Te Reo Rotarota Māori. He mea tikiake i te toa taupānga Āporo (Apple app store). (I puta i te tau 2016)

Tū ki Uta, Tū ki Tai: Te Pakanga Tuatahi o te Ao
He pae tukutuku e pupuri ana i tētahi kohinga rauemi ako kua tuhia ki te reo Māori hei hāpai i ngā mahi whakarite, whakaako hoki i ngā kaupapa rerekē e pā ana ki Te Pakanga Tuatahi o te Ao. Pāwhiritia te honongaitua nei First World War (I puta i te tau 2015)

Matapaki
He ataata e whakaatu ana i ngā tū uiui, matapakinga, whakakitenga hoki o tētahi hunga whakaaro nui, whakaako auaha, whakahaere rangatira i te reo Māori. Pāwhiritia te honongaitua nei EDtalks: Matapaki

He rauemi mā ngā kaiwhakahaere

E tika ana kia whai rauemi hāpai i ngā mahi whakahaere i ngā kura. Kua puta i a mātou ētahi rauemi whakahaere e tō ana i ngā mātāpono o Te Tiriti o Waitangi me ōna pānga ki ngā whakahaere o te kura. Ko Haepapa tētahi, ko te kohinga The Treaty of Waitangi and School Governance tērā atu. Tēnā mātaihia…

Treaty of Waitangi and School Governance
He mea whakaputa mā NZSTA mō ngā kura auraki e pā ana ki ngā āhuatanga e tika ana kia kitea i ngā rōpū whakahaere kura, arā, ngā Pōari Kura. Tirohia te kōnae nei Treaty of Waitangi and School Governance. (I puta i te tau 2015)

Haepapa
He rauemi e hāngai ana ki te whakahaere whai take i ngā kura arareo Māori taumata 1 me te 2. Tēnā pāwhiritia te honongaitua nei Haepapa – Effective Governance in Māori Medium (I puta i te tau 2016)

Whakapātanga

Ki te hiahia whakapā mai, tuku īmēra ki arareomaori@core-ed.org.

Tuhia te ‘Tānga, Whakaputanga’ ki te rārangi kaupapa o te īmēra.